Imphal, Feb 21: Manipur a•doko Assembly election matchotani ja•man BJP dolan sorkariko rikpiltaigen aro ia changode BJP sorkario NPP bak ong•jawaha ine Sombar salo Assam-ni Chief Minister aro salgro salaram a•dokrango BJP-ko re•dilenggipa Himanta Biswa Sarma parakataha.
Sombar salo, Manipur a•dokni Moirang-o BJP-ni tom•aniko ong•atanio Sarma, jinmana aganprakangengon, ia changoba Manipur-o BJP dolan sorkariko rikpiltaigen indiba ia changode BJP sorkario NPP bak ong•jawaha aro Congress dolde tangchapiltaiani cholan dongsrangjaha ine parakangaha.
Meghalaya a•dokni Chief Minister Conrad K Sangma-chi dilenggipa NPP dolo maming miksonganirangan dongja ineba Sarma, NPP-ko matnange aganaha.
“NPP-ni MLA-rang, BJP-ni ka•sachakanichisa Manipur sorkario minister-rang ong•pana man•aha. NPP-de an•tangni ine mesokna mamingan dongja,” ine North East Democratic Alliance (NEDA)-ni convenor aganaha.
Sombar salo Assam-ni CM, Manipur a•doko Moirang constituency-ni BJP candidate M Prithiraj Singh-na campaign ka•engmiting somoio ia kattarangko aganaha.’
Moirang constituency-o NPP-ni tikito Santi Singh aro Congress-ni tikito Sharatchandra Singh susaskaengachim ine nikna man•a.
