Imphal, May 29: Manipur a·doko so·sojengjeng ong·anirang batroroengon, ramram manderangko goanio aro bobil dake chakatgipa dolrang baksa police-rangni gogrikanio, police saksako man·chape gimik sakbonga manderang so·otako man·taiaha aro sak 12 manderang saknaanirangko man·na nangaha ine kobor on·aha.

Kobor on·timgiparangni u·iatani gitade, Manipur a·dokni skotong Imphal songjinma baksana dingtang dingtang biaprango manderang, curfew-ko manigija ramarangko champengna ong·katgrimbaani ja·man police-rang manderangko katatna gita tear gas-rangko goe, bangbango silchidarerangko gopongpongna gita nangaha.

Batanggimin salbrini gisepon, chel·chakenggipa sipai dolrang, silchidare ra·bitgipa bobil dolni sak 40 manderangko goe galna man·aha ine Manipur a·dokni chief minister parakataha.

Manipur a·doko iandake so·sojengjeng ong·anirang bon·changjaengani gimin dingtang dingtang dolrang baksa agangrike tom·tomaniko ra·bapilna gita Union Home Minister Amit Shah, Sombar saloni June 1 tarikona kingking Manipur a·dokona re·baengachim.

Re·anggipa May 3 tariko, Meitei jatnaba Scheduled Tribe (ST) gadangko on·china dabianiko jegale dingtang dingtang Tribal jatrangni re·jomanio rang·san dinggrikanirang ong·kataonin Manipur a·doko so·sojengjeng ong·anirang namchipna gita man·kujaenga aro ua somoioni da·alona kingking komibeoba sak 80 manderang so·otako man·na nangahachim.

Manipur a·doko iandake so·sojengjeng ong·anirang namchipjaengani gimin internet-koba sal 25-na chipe donatahachim.