Shillong, Feb 2: Budbar salo, Meghalaya a•dokni Chief Minister Conrad K Sangma, Umroh-ni Mawkasiang-o donggipa NELA Handloom & Silk Production Unit-ni kam ka•chakgipa aro training centre-ko oprake on•angaha aro ia tom•anio Mawryngkneng-ni MLA Pyniaid Sing Syiem, Textiles-ni Commissioner FR Kharkongor, Sericulture & Weaving-ni Director CB Sangma baksana NELA Handloom & Silk Production Unit aro Training Centre-ni nokgipa James E Dkhar-ba dongpae bak ra•angaha. Ia tom•anio a•dokni Chief Minister Conrad K Sangma, jinmana aganprakangengon, bading chiwalani kamrangko a•bachengatanio chadamberang dingtang dingtang ra•bianirangko chagrongna nanggenchimoba, uamangni jumangrangko chu•sokgipa ong•atna gita sorkari pilak nanga dakchakanirangko on•na jotton ka•enga ine parakangaha.

NELA Handloom & Silk Production Unit-ni nokgipa James E Dkhar-ko mittelpile aganangengon, an•tangtangni kamrangko maming saloba watgaljachina ua bading chiwalenggipa chadamberangko didiangaha.

Mikkang bilsi 10-ni gisepo lak bongamangni gita chadamberangna kamrangko tikate on•na nangenga ine janapatengon, bading chiwalani kamrangchisan chadamberangna dingtang dingtang kamrangko on•na man•gen ine Chief Minister aganaha.

Sorkarini kamrangosan pangchake dongaigija an•tangtangan bading chiwalanirangko jako ra•e gipinrangnaba kam ka•e cha•ani cholrangko on•skachina gitaba ua chadamberangko didiangaha.

Sika koanirangko bariatna aro training-rangko on•na gita gong lak 10 tangkarangko NELA Handloom & Silk Production Unit-na on•gen ineba ia tom•anio Chief Minister parakataha.

Ia Handloom & Silk Production unit-ni nokgipa James E Dkhar-na 2019 bilsini January jao ‘Entrepreneurship of the Month’ award-ko on•ahachim ine nikna man•a.