Shillong, Jan 13: Mawklot-Sohtyngab ramaoni Mawkhan-ona dakanggipa ramako black topping on•e tarina gita Sukrobar salo, Meghalaya sorkarini Deputy Chief Whip Pyniaid Sing Syiem baksana joltangni MLA Hamletson Dohling, pangchakaniko songe on•angaha.
Ia ramako tarina pangchakaniko songe on•anganio a•dok sorkarini Deputy Chief Whip, jinmana aganprakangengon, ia ramako tarichina gita Mylliem-ni gitcham MLA Hamletson Dohling, sorkariko didiahani giminsa da•alo, indita bilsirangna galchipgipa ramako tarina sorkari, tangka paisarangko chame on•aha ine mittelpilangaha.
Ia tom•anio kamtangko watanggipa Mylliem-ni gitcham MLA Hamletson Dohling-ba jinmana aganprakengon, ia song damgniko nangdimeatgipa ramako indita bilsirangna galchipe donahani a•sel songni manderang aro mongsongbate skulrangchi re•enggipa bi•sarang neng•nikanirangko chagrongna nangtokahachim indiba da•o ia ramako tarina gita sorkari tangka paisarangko chame on•ahani gimin ian songni manderangna namgni ong•gnok ine parakataha.
Ia jolo robol kal•chakramko taridapna gita bakan sorkari, gong lak 70 tangkarangko chamdape on•na sienga ineba Dohling parakataha.
