Shillong, Oct 6: Mawphlang bye-election-o susana gita Budbar salo UDP-ni candidate Eugeneson Lyngdoh, Shillong-ni DC office-o an•tangni lekkarangko on•eaha.

Lyngdoh-ni nomination file ka•ani somoio UDP-ni dilgiparang, jekai Lahkmen Rymbui, Balajied Syiem, Nujorki Sungoh aro UDP me•chik dolni dilgiparangba dongpaeaha.

An•tangni lekkarangko on•eani ja•man kobor ra•timgipa manderang baksa agangrikengon, ua joltangni political party-o ong•na nangnikahani giminsa UDP dolko seokaha ine Lyngdoh parakataha.

Mawphlang bye-election-o an•tangni chena ka•dongenganiko parakatengon, election-o ua chegipa ong•genchimode uni pagipa SK Sunn-ni a•bachengate donanggipa kamrangko matchotatgen ine Lyngdoh ku•rachakaniko on•angaha.

Indake ong•engon, Mawryngkneng bye-election-ode UDP susagija NPP-ni candidate Pyniaid Sing Syiem-na kam ka•skana tik ka•angaha.