New Delhi, April 23: India a•songo gnigipa changna coronavirus giproroenganichi manderang aro mongsongbate kangal chogrirang neng•nikanirangko chagrongna nangtaiengani gimin re•baenggipa May aro June jarangode sorkari, mirongrangko indin suale on•na gita Sukrobar salo tik ka•angaha.
“May aro June jarangode PMGKAY-ni ning•o PDS-ni bosturangko man•enggipa manderangna chinga kg 5 mirongrangko indin sualdapanggen. Ia changode chinga ia scheme-ni dalrangkode sualskajaenga,” ine Food & Public Distribution-ni secretary Sudhanshu Pandey, kobor ra•timgiparangna parakataha.
COVID-19 giproroengmiting somoio kangal cholgrirangna dakchakaniko on•na gita ia Pradhan Mantri Garib Kalyan Anna Yojana (PMGKAY)-ko re•anggipa 2020 bilsio May jaoni July jaona a•bachengatahachim aro ja•mano ia scheme-ko November jaona kingking ra•dottaiahachim.
Ia scheme-ni ning•o, National Food Security Act (NFSA)-o segatgimin nokdangrangna japrako ata aro mirong kg 5 baksana dal kg 1-ko on•dapahachim indiba ia changode mirongrangkosan on•skana miksongenga.
Mirongrangko skango gitan a•song gimikni kror 80 manderangna sualanggen aro mirongrangko jagni indin suale on•na gita komibeoba ton lak 80 mirongrangko nanggen.
Re•anggipa bilsio ia PMGKAY-ni ning•o NFSA-ni kror 80.96 manderangna ton lak 200-na baten mirongrangko suale on•ahachim aro ia mirongrangko indin suale on•anio gong kror 75,000-na baten sorkari koros ong•ahachim.
