Shillong, May 9: Ia bilsio MBOSE-ni ong·atanggipa HSSLC porikkako see chu·sokanggiparangoni ianpakode South West Garo Hills a·jaoniba Science stream-o 90 percent gapenba pass percentage-o skangrangona bate bang·bataniko nikna man·angaha.
Science-na agreba, commerce stream-o East Garo Hills, 95.71 percent, East Jaintia Hills 93.33 percent aro North Garo Hills gimikna komie 42 percent-ko man·enba ianpakode Garo Hills-onikoba namen dingtanganiko nikna gita man·aha.
Mongolbar salo, HSSLC-ni result-rangko MBOSE-ni pakatgipao, ia bilsi science stream-ko see a·dok gimikoni chu·sokgiparang 78.84 percent gapangaha, indake commerce stream-o pass percentage-ara 79.31 percent gapangskaaaha.
Science stream-o, South West Garo Hills-ni ja·man, West Khasi Hills District 85.4 percent-ko man·aha, indake East Jaintia Hills District gimikna komie 51 percent-ko man·skaaha.
Ianpakni Higher Secondary School Leaving Certificate (HSSLC) result-ode, Shillong, Laban Bengalee Boys’ Higher Secondary School-ni sakgni chatrorang science aro commerce stream-rango gimikna niksengbatangskaaha, jeon Arnab Dutta, science-o chu·gimik 483 mark-rangko man·e skanggipao chu·sokangaha, uandake, Rishab Purkayastha minggipa commerce stream-o chu·gimik 484 mark-rang baksa skanggipa ong·e niksengangaha.
Science stream-o gnigipa ong·e chu·sokanggipara, Shillong, St Edmund’s Higher Secondary School-ni Steffi Niza W Snaitang aro gittamgipao chu·sokanggipara Shillong, St Anthony’s Higher Secondary School-ni Eshita Bhattacharjee ong·a. Uandake, commerce stream-o Shillong, St Anthony’s Higher Secondary School-ni Akshat Poddar, gnigipao aro St Anthony’s Higher Secondary School-oni Satakshi Das aro Senha Paul-maang sakgni gittamgipao chu·sokangtokskaaha.
Ia bilsini Science stream porikkao top-10-o biming donggiparangoniara, Laban Bengalee Boys’ Hr Sec School-ni Subam Das (4-gipa), St Anthony’s-ni Soumitra Jha (5-gipa), RK Mission Hr Sec School-ni Rahul Das (6-gipa), St Anthony’s-ni Sargam Datta aro Sharmin Khongsit (7-gipa), St Anthony’s-ni Sangam Paul (8-gipa), St Anthony’s-ni Biswadeep Nath (9-gipa) aro St Anthony’s-ni Samjanai Synnah (10-gipa)-o chu·sokangaha.
Commerce stream-oni top-10 ong·giparangoniara, Laban Bengalee Boys Hr Sec School-ni Akshat Das (4-gipa), St Anthony’s-ni Deepak Sethia (5-gipa), St Anthony’s-ni Nengneiching (6-gipa), St Anthony’s-ni Phibalamti Marwein (7-gipa), Mawsynram Border Area Hr Sec School-ni Nangkhraw Laloo (8-gipa), St Anthony’s-ni Kashish Sharma, St Edmund’s-ni Eleazer Lytep aro Nongpoh, Alpha English Hr Secondary School-ni Rakhi Kumari (9-gipa) aro Upper New Nongstoin, Anderson Hr Secondary School-ni Daiairi Nongrem (10-gipa)-o chu·sokangskaaha.
Ia bilsini HSSLC porikkako see a·dokoni chu·sokanggiparangna, a·dokni skotong minister Pa Conrad K Sangma-ba sakanti chu·sokgiparangna an·tangni kusinirangko chapatenba, mikkangchi uamangni chu·sokdapanganina an·tangni namgipa ku·pattianirangko an·tangni Twitter-o seachi parakataha.
