Shillong, May 12: Bristibar salo, Meghalaya a•dokni Chief Minister aro National People’s Party (NPP)-ni national president Conrad K Sangma-ni dilanichi Meghalaya Democratic Alliance (MDA)-ni tom•aniko ong•atangaha aro ia tom•anio MDA-ni membor-rang baksa dingtang dingtang kamrangni gimin chanchirimangaha.
Tom•a matchotani ja•mano kobor ra•timgipa manderang baksa agangrikengon, MDA-ni ning•o donggipa MLA-rang aro dingtang dingtang party-ni dilgiparangko apsan ong•atna gitasa ia tom•aniko ong•atangaha ine Chief Minister parakataha.
“Ian chingni dakrongbewal tom•anisan ong•aia aro MDA-ni ning•o donggipa MLA-rang aro dingtang dingtang dolni dilgiparangko ku•cholsan ong•e rakkina tom•anisan ong•aia. Ia tom•anio mitam dilgiparang, sima arini bidingo sing•doangaha aro chinga uamangna iani bidingo talate on•aha. Indake ong•genchimoba, MDA-ni dilgiparang, ia tom•anio MoU-ko nipilchina gitade ku•pattianiko on•jaha,” ine Chief Minister aganaha.
Ia tom•anio mitam dilgiparang, CUET-ko man•chape Education-o nangchakegipa dingtang dingtang kamrangni giminba sing•aha aro chinga uamangna iarangni bidingo talataniko on•aha ine Sangma parakataha.
