Shillong, Feb 9: MDA sorkario Congress MLA-rang baksa kamrangko ka•rimna maming man•dikani dongjawa ine Budbar salo, South Shillong-ni BJP MLA Sanbor Shullai talatangaha.
Meghalaya a•doko Congress Legislature Party (CLP)-ba NPP-chi dilenggipa MDA sorkario bakrimna gita Mongolbar salosan a•dokni Chief Minister Conrad K Sangma-na chittiko on•eahachim aro ia chittio CLP-ni dilgipa Ampareen Lyngdoh baksana Congress dolni gipin MLA-rang, chong•motan Mayralborn Syiem, Mohendro Rapsang, Kimfa Marbaniang aro PT Sawkmie-ba soi ka•ahachim.
“BJP, Congress, chinga pilakan political dolrangsan ong•aia indiba mongsongbatgipade a•dokna namroro silroroaniko aro tom•tomaniko ra•bana gita nangrime kam ka•anikosa nanga,” ine Shullai aganaha.
Seokako man•gipa dilgiparangni mongsonggipa daitoan a•dokna namroro silroroaniko ra•baanisa ong•a ineba BJP MLA aganaha.
Congress dolni sakbonga MLA-rangko MDA-o rimnapahani gimin Mongolbar salosan BJP-ni state president Ernest Mawrie-de suk ong•gijaniko parakatskaahachim.
