Shillong, Sep 5: Meghalaya a•doko NPP-chi dilenggipa Meghalaya Democratic Alliance (MDA)-oni ong•kate sorkarini kamrangko Enforcement Directorate (ED) aro Central Bureau of Investigation (CBI)-chi inquiry dakatna ka•mikkenataniko on•ahani gimin Sombar salo, NPP-ni national vice president aro Meghalaya a•dokni Deputy Chief Minister Prestone Tynsong, BJP-ni dilgiparangko sing•doatenba, iandake ka•mikkenataniara election-na skang ‘dakmike’ mesokanisan ong•aia ine parakataha.
BJP-ni dilgiparang namgiparang ong•e kakketna kamko ka•bebeenggiparang ong•genchimode maini gimin MDA-oni ong•kate sorkarini kamko inquiry dakna CBI ba ED-ko watatna miksongenga ineba Tynsong sing•doataha.
MDA sorkario bakrimaniko ra•pilna nangnikenga ong•ode ra•pilna man•aigen indiba ian BJP-na ja•manchakdugaaha gita nikenga ineba NPP-ni national vice president parakataha.
Block I-ni dilgiparangko gronge agangrikani gimin janapatengon, Labang Nongpyllut Raliang jolni dilgiparang Sombar salo uko gronge, Block I-o ga•akgipa songrangko Meghalaya a•dokon donatpilchina didiaha ine Tynsong parakataha.
