Shillong, Feb 10: Meghalaya a•doko Congress dolni sakbonga MLA-rangba NPP-chi dilenggipa MDA sorkario bakrimeani ja•man, ia sorkariko chalaianio be•gruani dongjawa aro chu•gimik bilsi bongako matchoten chalaianggen ine Bristibar salo, Pynthor constituency-ni BJP MLA AL Hek parakataha.
“Congress dolni MLA-rang an•tangtang nangniken MDA sorkario bakrimeaha aro chinga (BJP) uamangni kosako maming champenganirang dongja. Chinga nangrime kamko ka•na kusi ong•aia,” ine Hek, Hub News-na aganaha.
Dingtang dingtang political dolrang baksa BJP, nangrime kamko ka•na kusi ong•aia ine janapatengon, politics-ode maming saloba ripeng ba bobil ong•kamani dongja ine Hek parakataha.
NPP-chi dilenggipa MDA sorkario BJP-de chonbegipa baksan ong•aiani gimin ma•mongoniba BJP-ni dilgiparang iani bidingo maming jegalani dongjawa ineba BJP MLA parakataha.
‘Congress Mukt Bharat’ ba Congress-oni jakgitelgipa India a•song Meghalaya a•dokonin a•bachengaha ineba Hek parakataha.
Congress MLA-rangko MDA sorkario rimnapani gimin BJP-ni state president Ernest Mawrie-de suk ong•gijaniko parakatskaahachim ine nikna man•a.
