Tura, Feb 11: National People’s Party (NPP)-chi dilenggipa MDA sorkarini ra•gatgipa Farmers Collectivisation for Upscaling Production & Marketing System (FOCUS) program-chi Meghalaya a•doko sak lak 4.5-na baten game ge•e cha•giparang namgniko man•gen ine Sukrobar salo, a•dokni Chief Minister Conrad K Sangma parakataha.
COVID-19 sajinmani a•sel game ge•e cha•enggipa manderang janggi tanganio neng•nikanirangko man•na nangahani gimin game ge•e cha•enggipa manderangna dakchakaniko on•na gita sorkari ia program-ko a•bachengataha ineba Chief Minister parakataha.
Chief Minister-ni aganani gitade, ia FOCUS program-ni ning•o game ge•e cha•enggiparangko ‘Producers Group’-rango dol dakatenba, dolni membor sakpraknan sorkari, gong 5000/- ka•e tangka paisarangko dakchake on•enga.
Ia tangka paisarangko game ge•e cha•enggipa manderang, an•tangtangni gama ge•anirangko tang•doatna gita jakkalna man•gen ineba ua aganaha.
Game ge•e cha•enggipa ra•gatgipa ia program-na sorkari, dingtangmancha gong kror 200 tangkarangko chame donaha aro batanggimin jagittamni gisepon, a•dokni Chief Minister, dingtang dingtang district aro block-rangona re•ange producers group-rangna, self help group (SHG)-rangna aro cooperative society-rangna gong kror 50-na baten tangka paisarangko sualahachim.
Bading chiwalanirangko tang•doatna gita sorkari, dingtang dingtang cholrangchi tangka paisarangko dakchake on•enga, jeon sudgri loan-rangkoba manderangna on•enga ineba Chief Minister parakataha.
Sorkarini on•enggipa dingtang dingtang cholrangko ra•china gita manderangko didiangengon, SHG-rangko aro cooperative society-rangko bikote, ia scheme-rangni namgniko ra•china gita Chief Minister ku•pattiangaha.
South Garo Hills a•jani Chokpot jolrango, Chokpot Water Supply, Guest House, Civil Sub-Division-ni gital building aro Baromile-oni Chokpot-ona ramarangko tarina tangka paisarangko chame on•an baksana dingtang dingtang namroro silroroani kamrangna sorkari, gong kror 100-na baten tangka paisarangko chamataha ineba Chief Minister parakataha.
