Shillong, Aug 8: Adita salrangna skang, Rimpu Bagan-oniko jokata man•gipa sakdok bi•sarangni gimin, Nongrah-o so•ota man•gipa bi•sa sakgnini ma•gipana tangka paisani gita dakchakanirangko on•ani gimin aro East Jaintia Hills a•jani ramao so•otako man•gipa ma•gipa sakgnini gimin Sombar salo Empowerment of Women-ni Meghalaya Assembly Committee chanchirimangaha.
Ia committee-ni chairperson aro MLA Ampareen Lyngdoh-ni parakatani gitade, East Jaintia Hills a•jani ramao so•otako man•gipa ma•gipa sakgnioni saksade bi•sa sak 10-ni ma•gipasa ong•achim aro ia sak 10-oni sak 8-de chonkuenggipa bi•sarangsa ong•achim.
Ia bi•sarangko Social Welfare department jako ra•e nirok sandina nanga ine ia tom•anio committee chanchiangaha ineba Lyngdoh parakataha.
Ia biapo so•otako man•gipa sakgipin me•chikni gimin chanchiangengon, ia me•chiko bilsi 8-oni bilsi 12 ong•gipa bi•sa sakgni donga aro ia bi•sarangko uamangni ambitang jako ra•e simsak nirokaniko on•na ku•rachakaha ine Lyngdoh parakataha.
Nongrah-o bi•sa sakgniko so•otgipani gimin janapatskaengon, so•ota man•gipa bi•sa sakgnini nokdangna nanga gita dakchakanirangko on•aha aro ia nokdangna ainni gita pilak dakchakanirangko on•na man•na gita gong lak 1 tangkako gamatchengaha ine committee-ni chairperson parakataha.
Tura-ni Rimpu Bagan-oniko jokata man•gipa bi•sa sakdoknaba ia committee, nanga gita dakchakanirangko on•ani gimin chanchiangaha.
Lyngdoh-ni parakatani gitade, Rimpu Bagan-oniko jokata man•gipa bi•sa sakdokoni sakgittamde bilsi 16 aro bilsi 17-ni gisepo ong•giparang ong•a aro bangki sakgittamoni saksade bilsi 15, saksade bilsi 13 aro saksade bilsi 3-san ong•kuengpiti.
Ia bi•sarangna sorkarini gita pilak nanga dakchakanirangko aro chel•chakanirangko on•enga ine committee-na ku•rachakaniko on•ataha ineba Lyngdoh parakataha.
