Shillong, March 10: A·doko bijolina neng·nikani mamlako ra·e adita ding·grikanirang ong·engon, warachakgipa dol Congress-na mikrakatsoaniko on·angenba a·doko warachakgipa dolko Dr Mukul Sangma-an mikkangchiba re·dilangkuode da·o jekai MeECL-na ong·enga ugita apsan obostarang Congress dolnaba ong·ani cholrang donga ine a·dokni skotong minister aro NPP dolni padot Pa Conrad Sangma, Butbar salo aganangaha.
Governorni aganprakani somoio house-o agangrikaniko ong·atmitingo MeECL-ni mamlao nangchape naatani bidingo ua ia kattarangko aganchakangaha.
A·doko bijoliko chalaiani a·bao neng·nikanirangko namatna gitade skotong minister aro power minister-ko ra·galchengosa man·aigen ine adita salrangna skang warachakgipa dolni dilgipa Dr Mukul Sangma-ni agananggipako gisik ra·atpile aganengon, iako dakna gita uamangni jako maming bil dongja jekon MLA-rang aro a·dokni manderangsa tik ka·na bil donga ine skotong minister agan-parakataha.
Da·o dilenggipaan mikkangchiba warachakgipa dolko nirokangkuode da·o MeECL-na obosta ong·enggipa gitan apsan obostarang haida warachakgipa dolnaba ong·ani cholrang donga ine Pa Sangma aganaha.
A·doko bijoliko watani obostao MeECL-o bilding-bildangko ong·ataniara bang·a dingtang dingtangrangoba nangchapchapani dongaha ine iako ma·sina nanggen ine Pa Sangma talataha.
Ia pilakni bidingo kam ka·atanirang ong·engon terminal-o man·gnigipana dongimin niam aro ja·rikatanirang dongachim indaken terminal-o man·gnigipa gong kror 840 tangkako uamang gamgen ine Congress sorkari ku·rachakaha indiba gong·sa-pelsakoba uamang on·na dongjaha ine u·iatenba, ua tangkarangko MeECL an·tangtang jeponikosa on·na gita nangaha ine aganenba, 2010 bilsioni gong kror 600 tangkarangko gamataha ineba Pa Sangma u·iatkuaha.
“Bijolina gamna nanggiparangko a·dok sorkari ua somoio matchote gamgenchimode haida MeECL da·ode adita nambata gadangosa ong·enaba dongachim,” ineba skotong minister parakatjolaha.
