Shillong, June 11: Meghalaya Energy Corporation Limited (MeECL)-ko chalaianirangko namdapatna miksonge, bijoli wataniko aro bikotanirangko man·chape pilak kamrango namdapaniko ra·bana system-ko gital dakpiltaiani gimin chanchirimna gita Meghalaya-ni Power minister Pa James K. Sangma, Sukrobar salo corporation-ni a·gipi officerrang baksa tom·aniko ong·ataha jeon adita nangchongmotgiparangko tik ka·angaha.
Tom·anio, department-ni pilak gadangrango mandeni bilrangko mangrakdapatna komibeoba corporation-o kam ka·gipa manderangko bakbakan kamna rim·na gita aro 30 percent bijolini kajinarangko gamkugija donggenchimoba maming a·sel grian songadam aro songjinma biaprango nosto ong·gipa transformer-rangko bakbakan bodolattokani giminba tik ka·angaha.
Leshka-Myntdu aro gital Umtru hydro project-rangko chalaiani aro nirokatani ba operation and maintenance (O&M)ko dondipata baksana substation-ko chalaina aro nirokatna BECIL-na bil on·anikoba dondipatanggen.
Je tom·anion, independent director, secretary power, MeECL-ni employee associations-ni seokgimin manderang gimikan bakko ra·angaha, jeon jakkalenggipa ge 3-na da·o on·enggipa O&M-ni tikkarangko nipiltaiatani gimin aro mandeni bilrangko kraa gita donata baksana gital technology-ko chalaina corporation-oni engineer-rangko bil gnangatani gimin nipilangna gita tik ka·jolaha.
Unbaksana, bijolini kajinako kraa damo jakkalgiparangko gamatani gimin nipiltaianiko dakchina MSERC-ko didiangnaba tik ka·jolaha.
Bijoliko dingtang dingtang watenggiparangni kam ka·anirangko nipilrorona gita Minister, jaantian tom·anikoba ong·atanggen.
Iana agreba, tom·anio tik ka·anggimin minggipinrangara – 1957 bilsi jolo a·bachenggipa namen gitchambegipa Umtru hydro project-ko gital dakpiltaina miksongani, kajina ra·aniko aro chimonganiko namdapatani. AT&C-ni gimaaniko komiatani, matchotkugijagipa pilak nanggipa niam aro tangka-paisa jakkalaniko CAG-chi audit ka·aniko matchotatani, bijoli jakkalgiparangko bangki kajinarangko gamatani aro da·o ong·enggipa ADB, ma·mongni scheme-rangko gong·rake a·bachengate on·ani giminba tik ka·angjolaha.
