Shillong, May 26: Megha Kayak Festival 2022 ko re•baenggipa October jani 13 tarikoni 16 tarikona ong•atanggen ine Meghalaya Tourism aro Ribhoi Water Sports & Tourism Cooperative Society Bristibar salo u•iataha. Ia Kayak ring chosusaaniko Ribhoi districtni Umtham song sambao donggipa Umtrew chibimao ong•atangna sienga. India gita dal•begipa a•songo ia a•gilsak gimikni Kayak ring chosusaaniko ong•ataniara Meghalaya a•doknaba rasong chaani ong•enga. Ia susaanio a•gilsak gimikni dam 80 a•songrang bak ra•angna sienga.
Ia festivalna lak 15 baksana gipin gamchatbegipa bosturangkoba donsoenga. Ia susaanio Olympicni ra•chakgimin kal•anirang jekai giant Slalom, extreme boater-cross and time trial races aro ugita gipin kal•susaanirangba donggen.
Ia feativalko ong•atanini miksonganiara Meghalaya a•dokni tourismko namdapatna aro tang•doatna ba Meghalaya a•dokko chi ba chibimao kal•ani aro susaanirango namgipa ong•aniko a•gilsakna parakna miksonganiba ong•jola.
