Williamnagar, Dec 18: Meghalaya a·dokko man·chengaoni bilsi 50 ga·dapaniko gisik ra·ani gita, East Garo Hills-ni district administration-ni dakdilanichi mija anti bon·achibara 16 aro 17 tarikrango Williamnagar-ni Rongrenggre Govt. Higher Secondary School kal·chakramo salgnina dal·bee aro an·saobee maniangaha.
Ia manianio, skotong minsiter-ni Chief Adviser Pa Thomas A. Sangma mongsonggipa sokgipa ong·aha aro sorkarini Chief Whip Pa Marcuise N. Marak mande ra·ako man·na kragipa sokgipa ong·e bakko ra·angaha. Uandake, rimchaksoani kattarangko Williamnagar-ni ADC aro Williamnagar Municipality Board-ni gital CEO Diana Guri Sangma aganangskaaha.
Unomiting tom·anio, East Garo Hills a·jani Deputy Commissioner Pa Jagdish Chelani, A·chik matgrik Pa Togan Nengminja Sangma sagini siani bilsi chang 150-gipako a·doko manianganiko janapjolenba, mikkangchi East Garo Hills a·jani silroro-namroroanina ku·cholsan kamko ka·china a·jani manderangko didianga baksana ia dal·begipa programko ong·atna man·na gita dakchakahanina Williamnagar-ni MLA Pa Marcuise N Marak-koba dingtangmancha mittelpilangaha.
Pa Marcuise Marak, programo bakko ra·e jinmana aganatengon, Meghalaya a·dokko man·chengani bilsi 50 ga·dapaniko gisik ra·e manianio a·jani manderangko kusi ong·e aro katchae manichina gita aganangskaaha.
Programona mongsonggipa ong·e sokgipa Pa Thomas Sangma, ia dal·begipa manianio dongpana man·anina an·tangni ong·aniko parakange, batanggimin bilsi 50-ko nipilatode a·doko bang·en dingtanganirangko an·ching nikna man·aha ine janapatenba, Meghalaya-ko namdapatna gita gisik nang·e kamko ka·gipa pilakkon ua dingtangmancha mittelangaha.
Ia manianio, mongsonggipa sokgiparangni jakchi, a·dokoni pilak game-ge·e cha·giparangna dakchakna gita Meghalaya sorkarini a·bachengatgipa FOCUS aro FOCUS Plus aro PROGRESS-rangni gita adita sak a·jani manderangna wak bi·sarang aro do·bisarangkoba suale on·angaha. Unbaksana, tom·a matchotani ja·man joljol Aqua Fest-ko oprake on·angenba, manderangna mesoke pal·na dongipa biap ba stall-rangkoba uamang niangjolaha.
Maniani skanggipa salo, A·chik jatni kal·susaaniko tange-ripinge rakkina miksonge, an·ding oka, jakpong pe·a aro rong·ma chilsusaa ba ugita dakgipa kal·susaatanirangkoba ong·atangaha. Apsan salon, Flower Show Competition, Pumpkin Carving Competition, Chess, Carrom, Singing, Dancing, Photography aro Painting competition-rangkoba ong·atjolaha.
Programko an·saodapatna gita, A·chik a·songoni da·ororo mingsingenggipa git ring·giparang jekai Dhean Shalang, Lening, RC Rabbie, Enosh, Ahuzo aro gipinrang attamchipak gitrangko ring·angtokaha aro programni bon·chotao Riprap dolba uamangni ga·sugipa aro mingsinggipa gitrangko ring·angachi manderangko an·saoatangjolaha.
Apsandake, maniani gnigipa saloba, jatni song·a-chanani bewalo song·susaatani, an·chengo Volleyball-ko kal·susaatani, Wood Carving, anaros cha·susaatani, Futsal Final aro bi·sarangni Fancy Dress Competition-rangko ong·atangskaaha.
Attamchibara, Bangladesh-oni sokbagipa Antu Rechil, uni gitrangko ring·e manderangko an·saodilanga baksana, A·chik a·songni niksenggipa ring·gipa dolrang jekai Nokpante, Dasuraka aro Rough Road-rangba doke-dame ring·achi programo bak ra·gipa manderangko an·saodapatangskaaha.
