Williamnagar, April 26: April 26 tarik-o Meghalaya a·dokni bilsi 50 gapaniko Williamnagar Rongrenggre kalchakramo an·saobee maniangaha. Ia manianio Kishan Mela, Industrial Exhibition aro dingtang dingtang Self Help Group-rangni bosturangko pala-sim·anikoba dakangjolaha.
Manianiko Williamnagar ni MLA aro Sorkarini Chief Whip Pa Marcuise N. Marak, East Garo Hills ni DC Pa Swapnil Tembe, GHADC ni gitcham CEM Pa Denang T. Sangma, Sorkarini Officialrang, Skul aro Kolej-ni Principal rangni mikkango oprake on·aha. Tom·anio Williamnagar ni ADC Pa L.Ch.Marak rimchaksoani kattarangko aganaha.
East Garo Hills ni DC Pa Swapnil Tembe ge·gipa-gamgipa sakantiko ge·a gamanio bimchipe kam ka·e an·tangtangni bosturangko nambate aro bangbate man·na gita kam ka·china didiani kattarangko aganaha. A·chik a·songni te·brongrangko a·palchi watatna uni miksonganiko parake, 2025 na skang East Garo Hills district ni ning·o me·su samjak rangko gipinrangoniko bree ra·bana nangjana gita aro district tangon chu·onge man·na gita ka·dongsoaniko jinmana parakaha.
Tom·anio mongsonggipa sokgipa ong·e Pa Marcuise N. Marak, ia salara sakantinan katchaani sal ong·a ine aganengon batanggimin bilsi 50 ni gisepo Meghalaya a·dokni chusokanirangko agan-talate sorkarini dakchakaniko on·enggiparangni giminba janapjolaha. Cholrangko ra·engon kakket aro bebeo bimchipe janggi tangani chol ine ra·e namgipa dakmesokgipa rang ong·chinaba didie mol·molangaha.
Bilsi 50 gapaniko maniani salo Williamnagar Arts and Culture Society mikchikkimbee Wangala-ko chroke mesokaha. Williamnagar ni Educere School dingtang mancha Meghalaya a·dokna tarigimin ka·srokbegipa gitko ring·e manianiko an·saodapataha aro Williamnagar ni mingsinggipa Loyola College-ni chatro chatrirangba gisiko nange chroke bak ra·angaha.
Ia manianio, FOCUS programni gita dol 10 ge·gipa-gamgipa dolrangna chequerangkoba sualangjolaha aro dingtang dingtang department jedake Agriculture, Horticulture, DCIC, Fisheries, Animal Husbandry & Veterinary, ATMA aro Krishi Vigyan Kendra ni dakchakaniko man·e chu·sokgiparangnaba boksis ba award-rangko sualangjolaha.
Salpaksani programo District Sports Department ni dakdilanichi Jat ni kal·susaani jedake budu salsusaa, rong·ma chilsusaa, ambol chilsusaa, jakpong pe·a, an·ding oka, wa·pong sika aro gando makkal pala susaanirangko ong·ataha. Susaanio chegiparangna Williamnagar ni ADC Pa L.Ch. Marak, Pa Aloysius Ch. Marak aro Ma Dimseritha A. Sangma mangni jakchi boksis rangko sualangaha.
