Shillong, May 12: Meghalaya a•dokni pilak sanram hospitalrangon palangrang gaptokna siengani gimin, a•dok sorkari tanggitik nanganio jakkalna amna gita palangrangko baridapatna miksongaha. Dakchakgipa skotong Minister Pa Prestone Tynsong-ni janapani gita, IIM-o ge 300 palangrangko tarisoenga unoni ge 100-de oxygen gnang ong•gen, Umsawli-o ge 100-ko tarisoenggipao ge 40-de oxygen gnang ong•skagen. Da•alona kingking je gita palangrang donga cholikuenga ineba Pa Tynsong talatdapaha.
Meghalaya a•dok gimiko hospital ge 21 dongaoni jeon Covid19 sabisiko sannani gnangchim gimik palang ge 706 dongaoni ge 416-ode gapaha indiba sorkari ge 823-ona bariatna miksongsamsoani gnang. Nazareth Hospitalo palang ge 100 dongaoni covid saako man•gipa sak 70-ko sanengaha. Nongstoin-ni Civil Hospitalo aro Jowai-ni Dr Norman Tunnel Hospitalo da•o dipet covid sagipako sanna dongkujaenga ine kobor-na ui•ataha.
May 12 tarikona see rakkianio parakatani gita, gital sabisi man•dapgipa sak 406 aro siangdapgipa sak 8 ong•enga.
