Shillong, Feb 1: Ia jani 27 tariko Meghalaya assembly-na pu·onatna gita nomination lekkarangko on·ani Mongolbar saloni a·bachengahaoba, Meghalaya BJP, 17-North Shillong constituency-o susaatna gita candidate-ko baseanio jajaengani gimin da·alonaba official candidate-ko parakata dongkujaenga.
BJP dolni tikito susana am·enggipa sakgni candidate-rangonira, Pa Michael Kharsyntiew, jean dolni mongsonggipa membor ong·a aro sakgipinara kamoni neng·takgimin a·gipi police officer Pa Mariahom Kharkrang, jean dolnide a·gittal mande ong·skaenga, uamang sakgnian party ticket-na susagriktokenga aro sakgnian BJP dolni seokgimin candidate-rang ong·ani gimino uamangoni saksako baseanio jajaengani a·sel da·alonaba parakkujaengachi North Shillong-ni manderangna jajaani ong·skaenganiko nikatna man·enga.
Indake ong·genchimoba, bimingrangko Delhi-china watdoataha aro party high command-ni ra·chakaniko uamang nisengenga ine janapatan baksa, tikitna seksekenggipa candidate bang·gipa consituency-rang baksa bimingrangkoba chinga kosakchina watdoataha aro BJP dol ianpakni eleksino gimik dam 60 constituency-rangon susagen ine Meghalaya BJP-ni padot Pa Ernest Mawrie u·iatskaaha.
Salgro-salaramni damgittam a·dokrango, chong·motan, Meghalaya, Tripura aro Nagaland-rango ru·utgijan ong·nasienggipa eleksinna BJP doloni susana am·enggipa candidate-rangko baseani gimin bon·kame tik ka·na gita January 31 tariko Central Parliamentary Committee (CPC) tom·e chanchirimahachim ine u·iatangenba, re·baenggipa eleksinna dolni mongsonggipa kamrangko ru·uta salrangonin tarisoahani gimin bon·kamgipa somoichibara official candidate-rangko parakomangba maming neng·nikanirangde dongjawa ine Pa Mawrie agandapataha.
