Shillong, Feb 27: Meghalaya Legislative Assembly-ni gital dilgiparangko seokna gita pu•onaniko Sombar pring 7:00 bajioni attam 4:00 bajiona ong•atangahaon, attamni 3:00 bajiona kingking a•dok gimiko pu•onani 63.91 percent gapangaha.
Sombar attamni 3:00 bajiona pu•onani, Eastern West Khasi Hills-o 81.71 percent ong•e a•dok gimiko bang•batgipa ong•aha aro West Khasi Hills a•jao 73 percent ong•e gnigipa ong•skaaha.
Attamni 3:00 bajiona pu•onani Ri Bhoi a•jao 72.17%, East Jaintia Hills a•jao 70.46%, North Garo Hills a•jao 68.68%, South West Khasi Hills-o 78.68%, South West Garo Hills-o 64.96%, East Khasi Hills-o 57.81%, South Garo Hills-o 60.39% aro West Khasi Hills a•jao 62.65% ong•e ia a•jarangon pu•onani bang•batgiparang ong•engachim.
Re•anggipa February-ni 20 tariko, a•dokni gitcham home minister aro United Democratic Party (UDP)-ni candidate HDR Lyngdoh, tanggitik ka•tong saaniko man•e siangahani gimin Sohiong constituency-ode MLA election-ko dingtang salona ra•doatskaahachim aro uandaken Sombar salo, a•dok gimikni dam 59 constituency-rangna ia election-ko ong•atchengahachim.
Ia chang Meghalaya Assembly election-o dingtang dingtang political dolrangoni aro Independent candidate-rang gimik sak 369 candidate-rang susaenga aro ia sak 369 candidate-rangko a•dok gimikni sak 21,75,236 electoral roll-rango biming segatgipa manderang seokengachim.
Sak 369 candidate-rangoni sak 36-de me•chik candidate-rang aro sak 44-de Independent candidate-rang ong•enga.
Ia koborko seatengmiting somoiona kingking, bang•bata dilgiparangan an•tangtangni constituency-rango pu•ontokmanahachim. A•dokni Chief Minister aro NPP-ni national president Conrad K Sangma, South Tura constituency-ni Walbakgre LP skul polling station-o pu•onaha, James K Sangma-ba Dadenggre-o pu•onaha, Hamletson Dohling-ba Mylliem constituency-ni East Lummawbah B Polling Station-o pu•onaha, Alan West Kharkongor-ba Sohra-ni Marai Ka Phon polling station-o pu•onaha, Mohendro Rapsang-ba North Shillong-ni Jaiaw Langsning-o pu•onaha, Macdalyne Sawkmie Mawlong-ba Nongpoh-o aro Sosthenes Sohtun-ba Jirang-o pu•onaha.
