Shillong, Mar 9: Opposition doloni susagipa candidate dongjahani gimin Bristibar salo, North Tura-ni MLA Thomas A Sangma, Meghalaya Legislative Assembly-ni 11-gipa Speaker-na seokako man•e ku•mikchetangaha.
Ua, Meghalaya Legislative Assembly-ni Hall-o gital Speaker ong•e ku•mikchetangaha aro uni ku•mikchetanio dingtang dingtang dilgiparang aro MLA-rangba dongpae bakko ra•angtokaha.
Sangma-ni ku•mikchetani somoio dingtang dingtang MLA-rang aganprakengon, uni u•i-ma•sianichi ua Speaker-ni kamko name ka•angna man•gen ine an•tangtangni ka•dongchakenganiko parakangtokaha.
Meghalaya Legislative Assembly-o Chief Minister-ni gitcham Chief Advisor ong•e kamko ka•gipa Thomas A Sangma, bilsi 10-na baten politics-o kamko ka•engahachim aro ua Meghalaya sorkario, Cabinet minister ong•eba kamko ka•ahachim.
Gital Speaker-ni ku•mikchetani somoio, adita salrangna skang a•gilsakko watanggipa gitcham MLA sakgni, chong•motan HDR Lyngdoh aro AH Scott Lyngdoh sagina MLA-rangni kalime seatgipa chittirangkoba poraiataha.
