Shillong, Oct 4: Arunachal Pradesh-ni Governor, Brigadier (Dr.) B.D. Mishra (Retd.), Mongolbar pring 10 bajio skotong songjinma Shillong-ni Raj Bhavan-o Meghalaya a·dokni Governor ong·e ku·mikchetangaha.
Governor-na gipinko seoke watatkujana kingking Arunachal Pradesh baksana Brigadier B.D Mishra-na Meghalaya-ni Governor ong·eba dangdike on·angchina gita bilko on·dapaha. Indake ong·engon, a·dokni Governor gitcham Pa Satya Pal Malik-ni a·dokna dangdike on·ani somoiba October 4 tarik, chong·motan Mongolbar salon bon·aha jenan dangdike on·angkuchina somoiko on·dapjaha.
Gital Governor-ni ku·mikchetatangani somoio, Assembly-ni agan-chalaitimgipa Pa Metbah Lyngdoh, a·dokni cabinet minister-rang Pa Lahkmen Rymbui, Pa Banteidor Lyngdoh, Pa Hamlet Dohling aro gipinrangba dongpatokaha.
Unomiting koborni manderangna aganangengon, Brigadier B.D Mishra, Shillong songjinmani baditan nitoaniko aro biaprangni namaniko rasong on·e aganangaha.
