Shillong, Feb 12: Gitalgipa Meghalaya a·dok ta·raken re·mikkangenga maina a·dok Sorkari skanggipa changna eri muga song ine upadi on·a gnang Umden-Diwon ko biming done Agriculture Minister Pa. Banteidor Lyngdoh ni jakchi da·al Sorkarini official rangni bak ra·paanio oprake on·aha. Skotong Minister Pa. Conrad K. Sangma ba uko a·dokni skanggipa Eri Muga Song ine Officially parakataha.
Jolo resom ba muga jo·ongoniko bikotgipa kildingchi sikgipa kogiparang maidakode nambata gadangona tang·dona man·gen aro ma·mongni dongimin “Atma Nirbhar Song” gita ong·gen una miksonge Umden-Diwon songko Meghalaya ni skanggipa Eri Muga Song ine biming donataha ine an·tangni twittero Pa. Sangma tapataha.
Umden-Diwon songo 70% manderang resom ba muga jo·ongko jile kildingko bikote sike koe cha·a, uamangko nambata gadangona ra·dona National Institute of Fashion Technology bakrime dingtang dingtang bewalo sika koanirangko skie on·anggen.
Eri Muga Ba·ra jekon Umden-Diwon jolo Ryndia ine minga uni gun ara uko jaktingtingchi sika aro ong·telaigipa rongrangchisa sim·a, ding·kario ua ba·ra ka·sina aro sin·kario ding·a. Songni manderang uko Ahimsa Peace Silk ineba biming dona.
