Williamnagar, Feb 24: Hub Music Project-ni gita videorangko tarisusaatgiminrangko re•anggipa bilsi 2020 ni December 26 tariko upload ka⋅ate uko manderangni youtube-o niani ba views-ko chanani Dec 30 walni 8 bajiona donsoe aro hub dolni 30% baseani bil-o pangchake chegipa dolrangko parakataha.
North Garo Hills Chilpara songoni Tengbat R. Marak, ‘A⋅chik Me⋅chikni Gun’ gitko video tariaha aro uko nigiparang gimik sak hajal 40 manderang gapanichi skanggipa biapo chegipa ong⋅aha. Una certificate baksa tangka gong 50,000/- ko on•angaha.
Gnigipao, manderangni nibatgipa video ‘Garo Hills’ jekon Mendipathar ni Rikchuat band tariahachim ua videoko sak 34000 manderangni nianichi gnigipa gadang-o dongachim indiba Hub Team ni 30% bil-ko jakkale baseanio uamang gittamgipa gadang-osa donatskaha.
Gnigipa gadangko Turani ‘The Eros Band’ man⋅angaha. Uamangni tarigipa video ‘Knabo Koborrangko’ manderang dongimin somoio nia gimik hajal 23 gapachim. Chegipa dolna boksis tangka gong hajal 30,000/ baksa certificate-koba on⋅aha.
Rikchuat band gitamgipa biapko man•e certificate aro tangka gong hajal 20,000/- ko manangaha.
Ia susaanio namnamgipa video rangko taritokahachim, uanoni saksa Meghalaya gimiko mingsinggipa dokna damna changgipa Tengnang Dawa ba uni tarigipa video ‘Airokrak’ ko watate bakko ra⋅ahachim indiba manderangni uni videoko donsogimin somoi-o niani 17000 mangmangsan ong⋅aiani gimin ua chena man⋅jaha.
Hub Music su⋅saani-o bakko ra⋅e chegiarangna February ni 23 tariko Meghalaya a⋅dokni skotong Minister Pa Conrad K. Sangma, pa Marcuise N. Marak MLA aro Govt. Chief Whip, East Garo Hills ni Deputy Commissioner Pa Swapnil Tembe, East Garo Hills ni Superintendent of Police Pa Bruno A. Sangma, Loyola School ni Principal aro gipin dilgiparang aro niksenggipa manderangni dongpa⋅anio Hub Music Contest ni Certificate aro cash prize rangko onangaha.
Meghalaya a⋅dokni skotong minister Hub dolko indakgipa program rangko ongatanina mitele chadamberangko an⋅tangtangni chang⋅a sapanirangko jakale chu•sokgipa manderang ong⋅china gita didiangaha aro Meghalaya sorkari dingtangmancha indake git ringna sapgiparangna boksisrangko on⋅a miksongenga ine parakangaha.
