Tura, Feb 15: Ia jani 27 tariko a·doko pu·onaniko ong·atnasienggipana 58-Rongara-Siju constituency-ni ning·o donggipa Rongara songo Mongolbar salo NPP-ni candidate-na campaign-ko ka·anganio, batanggimin bilsi-bongani gisepo dingtang dingtang dakgipa neng·nikanirang donggenchimoba, NPP-chi rikdilgipa sorkari a·dokna namroro-silroroaniko ra·bana gita man·aha ine skotong minister Pa Conrad K Sangma parakangaha.
“A·dokni dingtang dingtang biaprangona mongsonggipa project-rangko a·bachengate on·na gita man·aha aro NPP dolni miksonganian a·dokna mamingo mikkang nitegijan apsangrik aro chu·gimik ong·e pilak namroro-silroroaniko ra·bana ong·a ine NPP-ni padot parakataha.
“2018 aro 2023 bilsini political-ni obostarang chu·gimikan dingtangaha ine aganangengon, Meghalaya-ni manderang da·alo NPP dolo chu·gimik ka·dongtokani a·selan Mukul Sangma aro uni ka·rimskarangko Congress doloni ong·kate TMC-o napena gita draataha, aro batanggimin 2018 bilsini eleksino uamang dam 21 seat-rango cheaha indiba da·alo Congress dolo MLA saksaan dongjajok ine Pa Sangma aganangkuaha.
Congress dolo dilgipa baksa meligrikgijanirang dongani a·selan a·song gimikchin uamang dol bilgri ong·aha, maina pilak a·dokrangon Congress-ko manderang jegaltokaha ine matnange aganangkua baksana, Dr Mukul-ni niksamsoe TMC dolo napanganiara dal·en gualani ong·aha, maina ia dolna mikkangchi maming ka·dongani griaha aro Went Bengal-on dingtang dingtang cha·bokanirangchi so·so-jengjeng ong·enggipa dol ong·anio Meghalaya a·dokoba TMC dol baijawa gita nikenga ine parakangenba, TMC-o mikkangchina maming ka·donga grianiko ma·sien TMC-ni MLA Pa Marthon Sangma baksana Jimmy Sangma-maang doloni ong·kate NPP-o napetokaha ineba NPP-ni padot parakataha.
Indake ong·engon, Mongolbar salni bako damgittam constituency-rango tom·aniko ong·atanggipao dingtang dingtang political dolrangna chakpagiparangoni bang·aan NPP dolna chakgrimna gita ku·chakangtokaha.
