Tura, Nov 17: North Garo Hills a•jao gitchambatsranggipa aro damsamangmang donggipa Mendipathar College-ni pilak nanga dakchakanirangko on•na gita sorkari cholrangko sandigen ine Budbar salo, Meghalaya a•dokni Chief Minister Conrad K Sangma, ku•rachakaniko on•angaha.
Ia bilsio Mendipathar College-ni bilsi 50 gapaniko maniengachim aro ia manianio a•dokni Chief Minister Conrad Sangma-ba, Education Minister Lahkmen Rymbui, Assembly-ni Deputy Speaker Timothy D Shira, Kharkutta-ni MLA Rupert Momin aro Bajengdoba-ni MLA Pongseng Marak baksa dongpae bak ra•angaha.
Ia college-ni bilsi 50 gapaniko manianio a•dokni Chief Minister, jinmana aganprakangengon, a•doko lekka porani gadangko namdapatna gita MDA sorkari rake kamko ka•enga ine parakangaha.
“2018 bilsini election-na skang, cholko on•genchimode chinga lekka porani kamrangna gisik on•bate kamko ka•gen ine anga a•dokni manderangna ku•rachakahachim aro angni ku•rachakgimin gitan chinga sorkariko rikchengaonin State Education Policy-ko tariaha aro lekka porani gadangko nambatatna gita rake kamrangko ka•enga,” ine Sangma aganaha.
Lekka porani kamrangna sorkari bilsiprakon gong kror 2000-na baten koros ka•enga indiba ia tangka paisarang chu•ongkujaenga ineba ua an•tangni suk ong•gijaniko parakangaha.
Meghalaya a•dokni bang•bata LP skulrangan namsrangjaengahachim ine janapatengon, ia bilsini gisepon MDA sorkari, a•dok gimikni dam 200 sorkari LP skulrangko taridapna gita gong kror 100 tangkarangko chame on•aha ine Chief Minister parakataha.
A•dokni gipin dam 300 skulrangko taridapna gita sorkari sandienga aro iana tangka paisarangkoba sandienga ineba Sangma aganaha.
A•doko chatro chatrirang bang•batrorobaengani a•sel chubata gadangrango poraina admission-rangko man•jaengani gimin an•tangni suk ong•gijaniko parakatengon, da•o mikkang bilsi bongani gisepon chatro chatrirangni jelbra jelsuani lak 4-mangona tang•doanggnok indiba college-rango dam 45000-mangni seat-rangsan dongaia ine Chief Minister parakataha.
Iani giminsa sorkari, a•doko bang•bata college-rangko kulidapna aro college-rango biaprangko on•dapna gita krenge kamko ka•enga ineba Sangma aganaha.
Chatro chatrirang chubata gadangrango poraiangkuna cholrangko man•china gita sorkari community college aro model college-rangko a•bachengataha ine talatangengon, adita salrangna skangsan sorkari, ‘People’s College’ scheme-ni ning•o a•dok gimikni damsku college-rangna dakchakanirangko on•aha ine Chief Minister parakataha.
A•dokni bang•bata college aro higher secondary skulrango Science stream-rang dongkujani giminba ua an•tangni suk ong•gijaniko parakataha.
Mendipathar College-ko sorkarini jako ra•china dabienggipani bidingo janapatengon, ia dabianiko sorkari nianggen aro North Garo Hills a•janasan ong•aigija Garo Hills gimiknan dakchakanirangko on•na cholrangko sandigen ine Chief Minister, ku•rachakaniko on•angaha.
Ia manianio ua Mendipathar College-ni bilsi 50-na janggi tangani gimin segimin souvenir-koba oprake on•angjolaha.
Ia tom•anio a•dokni Education Minister Lahkmen Rymbui-ba jinmana aganprakangengon, chatro chatrirangni namgnina sorkari, uamangni gadangni kri scholarship-ko gong 15,000-ona bariataha aro jao gong 60/- ka•e on•gipa merit scholarship-koba jao gong 600-ona bariataha ine parakataha.
