Tura, Aug 25: North Garo Hills a·jani Mendipathar Railway Station-o donggipa Facilitation Centre-ko Budbar salo, Meghalaya a·dokni Chief Minister Conrad K Sangma, nokdonggae on·angaha aro ia centre-ko nokdonggae on·anio Meghalaya Legislative Assembly-ni Deputy Speaker Timothy D Shira-ba dongpae bak ra·angaha.
Ia Facilitation Centre-ko nokdonggae on·angani somoio a·dokni Chief Minister jinmana aganprakangengon, ia facilitation centre-ko kulianichi ia jolrangona re·baenggipa manderangko ia centre-on see rakkigen ine parakangaha.
Ia facilitation centre-ara gipin biaprangoni re·baenggipa manderangko nambate nirok sandianio district administration-naba dakchakani ong·gen ineba Chief Minister aganaha.
Mendipathar railway station-ara Garo Hills-ni manderangna bang·a namgniko on·enga ine janapatengon, ia railway station-ko kulianichi jolo songdongenggipa manderang, altuaen da·o Assam-ni dingtang dingtang biaprangona songre songgabatna man·engaha ine Chief Minister aganaha.
Chief Minister-ni aganani gitade, manderangsan ong·aigija ia railway station-oni da·o game ge·e man·gipa ma·manti bosturangkoba gipin biaprangona ra·angna man·engaha aro ian game ge·e cha·enggipa manderangna bang·a namgni ong·enga.
Meghalaya a·dokni dal·batsranggipa food park-ko bakan Mendipathar-o kulina sienga ineba ia tom·anio ua jinmana parakataha.
Mendipathar-o railway station dongahani gimin a·dok sorkari, gong kror 100-ni food park-ko Mendipathar-o kulienga ineba Chief Minister parakataha.
Mendipathar-o dingtang dingtang nangchongmotgipa kolrang aro mongsongbate rel rama dongahani giminsa sorkari, dingtang dingtang kamrangko Mendipathar-ona ra·baenga ineba Chief Minister parakataha.
