Tura, July 2: Sukrobar salo, Meghalaya a•dokni Chief Minister Conrad K Sangma, North Garo Hills a•jani Mendipathar-ona re•baani somoio Sister Rose-ni kuligipa Mendipathar Multipurpose Cooperative Society-ko niangjolaha.
Ia Cooperative Society-ko Sr Rose, bilsi 20-mangna skangan kulie, ia jolrango game ge•e cha•enggipa aro self help group (SHG)-rangko tang•doatna kamko ka•engachim.
Garo Hills-o rubber bolrangkoba Sr Rose ge•dilchengahachim aro uandaken Garo Hills-ni dingtang dingtang biaprango da•o manderang rubber bolrangko ge•e janggi tangtokengahachim.
Mendipathar-o Sr Rose-ni rubber chimongchakram biapkoba Chief Minister niangaha aro mikkangchi rubber ge•aniko tang•doate namgnirangko ra•badapna gita ua Sr Rose baksa agangrikangaha.
Game ge•e cha•giparangko aro SHG-rangko tang•doatna kam ka•anio dakchakanirangko on•na gitaba Chief Minister ku•rachakangaha aro Garo Hills-o game ge•e cha•enggipa manderangni janggi tangani gadangko tang•doatna gita proposal-ko on•china Sr Rose-ko didiangaha.
