Shillong, May 13: Sukrobar pringnian mikkarang jimbee waanganichi, Shillong songjinmani dingtang dingtang biaprango chi bananirangko nikna man•aha.
Bang•bata biaprangon chirang, a•aoni feet 1 ba feet 1.5-mangni gita chirang banahani a•sel ja•achi re•ruraenggipa manderang aro chonchongipa garirangba re•ruraanio neng•nikanirangko chagrongna nangtokaha.
Ia anti a•bachengaonin Shillong songjinmao mikkarang jime wana a•bachengaha indiba Sukrobar pringonin mikkarang konta 5-6-mangna dontonggija jimbee waanganichi songjinmani dingtang dingtang biaprango chirang banna gita a•bachengaha.
Shillong songjinmani ongipa biaprang, jekai Demseiniong, Polo aro uandakgipa biaprangode chirang jokangna man•jae iandakgipa obostarangko nikna man•rongachim indiba Sukrobar salode Laitumkhrah aro uandakgipa biaprang, jeon biaprang namen apchangkate ong•achim, uandakgipa biaprangoba chirang jokangna man•jae chirangni sikkonge dongako nikna man•aha.
Mikka jime waanichi chi bananiko Shillong songjinmaosan ong•aigija Shillong songjinmana bate chubatgipa biaprang, jekai Nongkrem aro uandakgipa songrangoba nikna man•aha. Ia songrango chiringrangoni chirang joksrubae mongsonggipa sorokrangona aro manderangni dongchakenggipa biaprangonaba joksrubaaniko nikna man•aha.
Indake ong•engon, Polo aro Demseiniong gita dakgipa biaprango chirangni sikkonge donganiko namatna gita sorkari, nalarangko tarianio gong krorni kror tangkarangko jakkalengoba ia biaprango chirang jokangna man•jae sikkonge dongengani gimin manderang, sorkarini kamko sing•doangtokaha.
