Shillong, Mar 17: 2022-2023 bilsina tarigimin budget-o janapgimin gita gong kror 18,881 tangkarangko koros ka•na a•dok sorkarina bil on•gipa bill-ko man•chape gimik mingsni bill-rangko pass ka•enba, Meghalaya Legislative Assembly-ni Budget Session-ko Bristibar salo matchotataha.
Ia sal 10-na ong•atanggipa budget session-ko re•anggipa March-ni 4 tariko a•bachengahachim aro ia session-ni bon•kamgipa salo, voice vote-ko dake, ‘The Meghalaya Appropriation (No.II) Bill, 2022’ baksana sorkarini gipin bill-rangkoba Assembly-o pass ka•angaha.
Gong kror 1,849-ni deficit budget-ko re•anggipa March-ni 9 tariko a•dokni Chief Minister aro Finance Minister Conrad K Sangma, Assembly-ona ra•angahachim aro ia budget-o ua gong kror 16,068-ni chu•gimik receipt-rang aro gong kror 17,917-ni chu•gimik expenditure-koba hisape donangahachim.
Ia budget session-ni bon•kamgipa salo pass ka•e donanggipa gipin bill-rangara, Meghalaya Compulsory Registration of Marriage (Amendment) Bill, 2022, Meghalaya Settlement of Arrears under the State Taxation (Amendment) Bill, 2022, Registration (Meghalaya Amendment) Bill, 2022, Meghalaya Fiscal Responsibility & Budget Management (Amendment) Bill, 2022, Contingency Fund of Meghalaya (Amendment) Bill, 2022 aro Meghalaya State Agricultural Produce & Livestock Marketing (Promotion and facilitation) (Amendment) Bill, 2022 ong•achim.
Ia bill-rangko jinma vote ka•e pass ka•angani ja•man ia budget session-ko Meghalaya Legislative Assembly-ni Speaker Metbah Lyngdoh matchotataha.
