Shillong, Feb 24: Wah Umkhrah chibimako rongtalatani, manderangna naljokaniko on·ani, china neng·nikaniko namatani, garirangni sket-changket ong·aniko komiatani, ramarangko tarie on·anirangko pilakna skang mikkango done kam ka·gnigiparangko chappa ka·gimin ki·tapko, North Shillong constituency-oni NPP-ni candidate ong·e susaenggipa Pa Ransom Sutnga, mija Bristibar attamo una chakgipa ritcha manderangni dongpaa baksa Mawkhar-o eleksinna tom·aniko ong·atanggipao oprake on·angaha.
Songjinmao gari-gorani sket-changket ong·aniko komiatani gimin aganangengon, PWD-ni Executive Engineer (EE) gitcham, bus-rang, taxi-rang aro chakka samgnigipa garirangko jakkalaniko tang·doatna nangchongmotenganiko agan-ku·pattiangan baksa, parking lot-rangko aro nangdimatgipa ramarangko bang·en tarina nangenganikoba chanchirimaniona ra·baaha.
Chadamberangni kam gri ong·tokengani gimin aganangskaengon, dingtang dingtang sorkarini department-rango kamna bangbang ong·enggipao kolgapatna nangenganiko, kangal-cholgri nokdangoni poraienggipa bi·sarangna indin lekka-porani cholko on·a baksana, kal·susaani aro academic-rango bak ra·gipa chadamberangko bang·batatna gita aro uamangko gisiko nangatna tangka-paisachi dakchakanirangko on·na nangenganikoba Pa Sutnga, tom·ao parakataha.
Jolni saksa Assistant Rangbah Shnong ong·eba dangdike on·enggipa Sutnga, gittimni nokma ba dorbar shnong-rangna dingtangmancha tangka-paisachi dakchakaniko on·anichi a·dok sorkari aro district council-rangni ra·chakaniko nangchongmotengani giminba aganangaha.
Batanggimin salo gipin dolna chakgiparangni Mawkhar-o donggipa uni nokko chadrapani mamlao Pa Sutnga, CCTV-rangko donani a·sel adita kontarangni ja·manon police, dos dakgiparangko rim·na man·aha ine aganenba, manderangni naljokanina gittimni pilak biaprangon CCTV-rangko donna nangchongmotenganikoba ua aganangkuaha.
A·dokni sima-ari jolo songdongenggipa manderangni neng·nikanirangni gimin janapangskaengon, Assam baksa sima-arini bidingo neng·nikanirangko name agan-golpogrikanichi aro bak man·pagiparangko man·chapatachi golmalrangko namgrikate on·na nangchongmotaniko parakatan baksa, a·doko ILP-ko ra·gatchina ma·mong sorkariko mol·mole State assembly-o iako jinma ra·chakangaha ineba Pa Sutnga agandapataha.
ILP-ni gimin ma·mongoni maming kobor dongkuja aro adita salna skang, ma·mong BJP-ni General secretary Pa Rituraj Sinha, ILP-ko a·doko ra·gatode tourism industry-na neng·nikani ong·gen ine a·kangangaha, indiba, Sikkim a·dokko niatgenchimode, tourism-ni gita a·doktangni manderangna kamrangko ong·katatani minggipin chol dake uamangni ra·skaenganiko nikatna man·gen ineba NPP-ni candidate parakataha.
Land Transfer Act-ni gimin aganangskaengon, ian tribal-rangni a·arangko chel·chakna gita dongimin niam ong·a, indioba, Constitution (Scheduled Tribe) Order 1950-o salgro-salaram a·dokrangni gipin tribe-rangkoba man·chapatanio, ST ine chanako man·pagipa gipinrangba Meghalaya-o a·a-chiko brepana man·na gita 1950 bilsio hukumko on·anggipao pangchake ST list-ko taridapna ba namdapatna gita nangenganikoba NPP-ni candidate, tom·ao aganangkuaha.
