Nongpoh, Feb 17: Bang·gija salrangni gisepon a·doko assembly-na pu·onaniko daknasiengahani gimin manderangni chakpaaniko am·na gita National People’s Party (NPP), Sukrobar salo Jirang constituency-ni ning·o donggipa Patharkhmah songni kal·chakramo chongipa rally-ko ong·atangaha aro ia rally-o NPP-ni candidate ong·e susatainasienggipa jolni MLA Pa Sosthenes Sohtun, a·dokni dakchakgipa skotong minister Pa Prestone Tynsong, Sniawbhalang Dhar, Jirang-ni MDC Victor Rani-maang baksana a·dokni aro district unit-ni NPP dolni dilgiparangba bakko ra·angtokaha.
Tom·ao jinmana aganprakangengon, jolni MLA Pa Sosthenes Sohtun, Jirang constituency-na chu·gimik kamko matchotatna man·kugijagipa bang·en namroro-silroroatani project-rangko aro dingtang dingtang a·barango namdapatanirangko nangenga, maina bilsi-bongao uni MLA ong·e kamrangko ka·anio aro bang·a project-rangko chu·sokatanio chu·gimikkode ka·sokja ine parakatenba, a·jatangni ning·o rama-jal·langrangko tarie on·anichi da·alo bang·en namroro-silroroaniko nikna gita man·engaha, unbaksana, a·jao lekka-porani gadangko on·anio tang·doaha, Patharkhmah-ko Civil Sub Division-ona ra·doataha, Byrnihat PHC-ko CHC-ona aro gipinrangkoba ra·doattokaha ine MLA parakataha.
“Manderangni seoke watatako man·e, bang·a project-rangko matchotate on·na gita ua jottonde ka·aha, indake ong·genchimoba, mitamrang uni kam ka·anirangko chu·ongnikjae uni kosako matnange aganenggiparang gnang ine janapatenba, ia pilaknan uni constituency-ni manderang re·baenggipa 27 tarik, pu·onaniko salo aganchakaniko on·anggen ine Pa Sohtun aganangkuaha.
Unomiting, a·dokni dakchakgipa skotong minsiter Pa Prestone Tynsong, jolni MLA-ko chasongrangna galchipako man·gipa Jirang constituency-na namroro-silroroatani kamrangko ka·ahanina de·mitttele aganangan baksa, NPP-chi rikdilgipa sorkari batanggimin bilsi-bongani gisepo a·dokni namroro-silroroanina, manderangna nambata janggi tangani cholrangko on·na gita gisiko nangbate kamrangko ka·aha, indioba, high level committee-ko janape gipin political dolrangoni matnange agananirangko dakaiengkua ine parakataha.
Beben, high level committee-de gnang indiba, ia committee-ni kaman a·doko songdonggipa manderangni namgnina aro a·dokni namroro-silroroanina daksamsoe kamko ka·gipasa ong·aia ine talatenba, Jirang constituency-ni MLA, ia bilsi-bongani gisepo mamingkoba dakjaha ine mitamrangni matnangenganina, bebegita Jirang constituency-ni MLA, manderangna tol·e aganenga ong·ode uni kosako matnanggipa manderang mokordomako segatna gita nanga ineba Pa Tynsong agandapataha.
