Shillong, Aug 16: A·songni gipin biaprango gitan Meghalaya a·dokoba India a·songni chang 76-gipa jakgitelani salko Sombar salo maniangaha.
Meghalaya a·dokni skotong Shillong songjinmao, a·songni jakgitelani salko manianio a·dokni Chief Minister Conrad K Sangma, a·songni nisanko songdoe on·angenba dol 22 parade ka·gipa dingtang dingtang sipai dolrang baksana scouts aro guides-rangko salam ka·angaha.
Ia salko manianio a·dokni Chief Minister, NE Circle-ni Chief Post Master General Subrat Das-ni dongpaanio India a·songni jakgitelko man·aoni bilsi 75 gapaniko maniani bak gita ‘Special Cover’
-ko oprake on·angjolaha aro Shillong songjinmani dingtang dingtang gittimrangko nitoatanio nambatgipa gittimrangnaba boksisrangko suale on·angaha.
Ia salko manianio dingtangmancha an·tangtangko on·kange kam ka·enggipa police officer-rangnaba Meritorious Service Police Medal-rangko on·angaha aro ia medal-rangko man·gipa police officer-ranga, 6th Battalion Meghalaya Police (MLP)-ni Commandant Lakador Syiem, West Jaintia Hills a·jani Superintendent of Police (SP) Bikram D Marak, 4th MLP Battalion-ni Deputy Commandant TC Chacko aro AB Inspector Galdinson R Marak ong·a. Union Home Minister’s Medal for Excellence in Investigation-ko Deputy SP Pyrkhatlang Suchiang-na on·angskaaha.
Una agreba, ia salko manianio Meritorious Home Guards & Civil Defence Medal-ko Home Guards-ni Sub-Inspector Kharnesh A Sangma aro Home Guards-ni Havildar T Marbaniang-na parakataha.
March Past ka·susaanio skanggipa boksisko St Mary’s Higher Secondary School, gnigipa boksisko Nongrah Presbyterian Secondary School aro gittamgipa boksisko Seven Set Higher Secondary School cheangskaaha.
Ia salko manianio dingtangmancha Best District Hospital aro Eco-Friendly Health Facilities award-ko chegipa Tura Civil Hospital-na Kayakalp Award-ko, Best Community Health Centre (CHC) award-ko Sohiong CHC, Best Primary Health Centre (PHC) award-ko Jongkha PHC aro Best Health & Wellness Centre award-ko Thynroit Sub Centre-na on·angaha.
A·songni chang 76-gipa jakgitelani salko manianio dingtang dingtang skul, college aro dolrangni dakmesokanirangko, chrok mesaanirangko aro git ring·anirangkoba nikangna gita man·aha.
