Shillong, June 14: Meghalaya a·dokoba gnigipa changna COVID-19 giproroengani gimin Meghalaya sorkari, nangani kri gital Life Support Ambulance-rangko a·dokna bi·dapataha ine Sombar salo, Meghalaya a·dokni Chief Minister Conrad K Sangma parakataha.
Chief Minister-ni parakatani gitade, iandakgipa bol 11 ambulance-rangko DoNER Ministry, Meghalaya a·dokna chame donmanaha aro ia ambulance-rangko sorkari, nangani kri a·dokni dingtang dingtang biaprango donatgen.
Meghalaya a·dokni dingtang dingtang health centre-rango life support ambulance-rang dongjaenga ine opposition dolni matnanganina aganchakaniko on·angengon, re·anggipa bilsio bregimin ambulance-rangoni bang·batan sagipa manderangko salrurana bregiminrangsa ong·a aro ua somoio nangani krisa ia ambulance-rangko sorkari breataha ine Chief Minister parakataha.
“Indiba ia somoirango a·doko gnigipa changna COVID giprorotaiengani gimin sorkari, nangani kri gital life support ambulance-rangko a·dokna bi·dapataha,” ine Sangma aganaha.
