Shillong, Jan 21: Meghalaya a·dokko man·aoni bilsi 50 gapaniko da·al salni bako, a·dokni skotong Shillong songjinmao mikkim gnangbee manidilangaha.

Meghalaya a·dokko 1970 bilsini April jao jakgitelgipa a·dok ine Assam a·dokoniko bake on·ahachim aro ia a·dokko North Eastern (Re-organisation) Act-ni ning·o chu·gimik a·dokko man·aha ine 1972 bilsini January 21 tariko parakahachim.

Meghalaya a·dokni bilsi 50 gapaniko manianio a·songni Prime Minister Narendra Modi, Meghalaya a·dokni Governor Satya Pal Malik aro Meghalaya a·dokni Chief Minister Conrad K Sangma-ba, a·dokni manderangna namgipa skanirangko parakataha.

A·dokni bilsi 50 gapaniko Shillong-o manianio dingtangmancha ‘Statehood Movement’ ba a·dokni jakgitelaniko man·na krengmiting somoirango ong·anggipa obostarangko dake mesokangjolaha.

Ia salko manianio Meghalaya a·dokni bilsi 50 gapani bidingo segimin aro gisik ra·na tarigimin stamp-koba oprake on·angaha.

Ia salko manianio Meghalaya a·dokni Deputy Chief Minister Prestone Tynsong-ni jakchi, gital Administrative Township-na pangchakanikoba songe on·angjolaha aro ia manianio Shillong Chamber Choir-ba, uamangni namnamgipa gitrangko ring·e manderangko an·saoatangaha.

Ia salko manianio dingtangmancha Meghalaya Day award-rangkoba mande sakgittamna on·angaha aro uan U Tirot Sing Award-ko Benedict Shkemlang Hynniewta-na, Pa Togan Sangma award-ko Father Charles Ch Sangma-na aro U Kiang Nangbah award-ko Halen Nongtdu-na on·angaha.

Meghalaya a·dokni bilsi 50 gapaniko Shillong songjinmaona agreba dingtang dingtang a·jarangoba bang·gija manderang baksa maniangskaaha.