Shillong, July 12: Meghalaya a•dokni Census town-rango MGNREGS-ko Mongolbar salo, Meghalaya a•dokni Chief Minister Conrad K Sangma, Shillong songjinmani State Convention Centre-o a•bachengataha aro ia tom•anio a•dokni C&RD Minister Hamletson Dohling aro C&RD-ni Principal Secretary Sampath Kumar-ba dongpae bak ra•angaha.
Meghalaya a•dokni Census town ba jillarango MGNREGS-ko a•bachengate on•anganio a•dokni Chief Minister, jinmana aganprakangengon, census town-rangni bidingo talataniko on•ahani gimin India sorkarini Rural Development Ministry-ko mittelpilangenba, ramram neng•nikanisan ong•aigenchimoba ru•uta somoirangna namatchipna man•jaenggipa neng•nikani ong•engachim ine parakataha.
Census town-rangko bak dakanio name talbrejahani a•selsa census town-rang, urban aro rural scheme-rangni namgnirangko man•jaha aro bang•a namroro silroroatani program-rangko man•rikjaha ineba Chief Minister parakataha.
Chief Minister-ni parakatani gitade, songadam nokadamrangosan MGNREGS-ko ra•gatna man•genchimoba census town-rangkoba urban area ba cantonment area ine u•iatanirang dongkujani gimin census town-rangoba MGNREGS-ko ra•gatna man•aigen ine India sorkari talataniko on•angaha.
MGNREGS-ni kamrango Meghalaya a•dok chu•sokgipa ong•enga aro ia program-ni namgnirangko bang•bata manderang man•na nanga ineba Chief Minister aganaha.
MGNREGS-ni committee-rango 15 percent biapko me•chikrangna kange donchenggipa a•dokrangoni Meghalaya a•dokba skanggipa a•dok ong•a aro da•alo dingtang dingtang VEC-rango sak 2500-mangni gita me•chikrang secretary-ni kamko ka•enga ineba Sangma parakataha.
