Shillong, Jan 3: India a•songoba COVID-19-ni Omicron giproroengahani gimin January 5 tarikonide Meghalaya a•dokoba adita niamrangko ra•gattaignok ine Sombar salo, a•dokni Chief Minister Conrad K Sangma parakataha.
Chief Minister-ni parakatani gitade, a•doko Omicron-ko champengsona gita a•dok sorkari, jinma tom•bimonganirangko champengna tik ka•angaha.
Da•o dipet Meghalaya a•dokode Omicron-ko man•giparang dongkujaengani gimin niamrangko ra•gattaina nangengaha ine janapatengon, Shillong songjinmaode private gari gorarangni re•ruraaniko komiatna gita salsa odd number aro salsa even number dake garirangko watna sorkari tik ka•angaha ine Chief Minister parakataha.
Gipin biaprangoni a•dokona re•baenggipa manderang tika ponggniko su•e ra•an baksana konta 72-ni gisepo porikka ra•e negative ong•ani report-ko on•na nanggen aro porikka ra•ani report dongjagenchimode entry point-rango porikka ra•taina nanggen ine Chief Minister parakataha.
Night curfew-koba pilak a•jarangon walni 10:00 baji dipet ra•gattangtaignok ineba Chief Minister u•iataha.
Sorkarini donatgimin niamrangni bidingo a•jatangtangni deputy commissioner-rang, manderangna seachi u•iatgen ineba Sangma parakataha.
