Tura, Feb 24: Sukrobar salo, a•songni Prime Minister Narendra Modi, Meghalaya a•dokona re•baenba, Shillong aro Tura jillarango BJP-ni candidate-rangna campaign ka•angaha.
Tura-o Prime Minister Narendra Modi-ni tom•bimonganiko Alotgre stadium-o sokachakaha, jeon ua Garo Hills gimikni BJP candidate-rangna campaign ka•angaha.
Ia tom•bimonganio PM Modi, jinmana aganprakangengon, Garo Hills-ni manderang A•chikkuko jakkala ine ma•sijaenba, Khasi ku•sikchisa salam ka•skaaha.
NPP-chi dilgipa MDA sorkarini kosako matnange aganangengon, ma•mong sorkarini ra•gatgipa pilak scheme-rangnan tangka paisarangko nanga gita Meghalaya sorkarina on•atahachim indiba ia tangka paisarangko a•dok sorkari, manderangni namgnina jakkaljahani gimin pilak sorkari scheme-rangan chu•sokgipa ong•jaha ine PM Modi parakataha.
Meghalaya a•doko sorkariko rikna man•genchimode a•doko namroro silroroaniko ra•baan baksana samba jolo donggipa gipin a•songrang baksa bakrime kamko ka•gen ineba Prime Minister ku•rachakaniko on•angaha.
Meghalaya a•dokni manderang BJP-ko changsa seokahaode, kamrangko chu•sokate on•ani gimin gipin changrangoba chepiltaitaignok ineba ua aganaha.
Dingtang dingtang kamrango namroro silroroaniko ra•bana gitasa BJP kamrangko ka•a ine janapatengon, Meghalaya a•doko lak 6 manderangna chi pipe-rangko sale on•aha ine Prime Minister parakataha.
BJP-na Meghalaya a•dokara namen gamchatbegipa a•dok ong•a ine janapatskaengon, a•songni gipin a•dokrangna on•enga gitan BJP, Meghalaya a•dokni manderangnaba apsan bak rengsiko on•na nangnikenga ine PM Modi parakataha.
Tura-o PM Modi-ni tom•bimonganiko ong•atanio Garo Hills gimikni BJP candidate-rangba bakko ra•angtokaha.
Iana skang, Shillong songjinmaoba a•songni Prime Minister Narendra Modi, State Central Library-oni Khyndailad (Police Bazar)-ona ong•atanggipa Road Show-o bakko ra•angaha aro uni ja•man, BJP-ni candidate-rangna campaign ka•e, Khyndailad-o jinmana aganprakangaha.
Road Show-o bakko ra•na skang ua dingtangmancha a•dokni matgrik sakgittam, chong•motan U Tirot Sing, U Kiang Nangbah aro Pa Togan Nengminja Sangma-na, uamangni mangkrongrango pul bibalrangko on•e mande ra•pilskaaniko dakangaha.
