Shillong, May 22: Shillong songjinmani Mawdiangdiang-o rikenggipa gital Meghalaya Assembly building-ni nokkingo tarigipa ‘dome’ Robibar pringwalo be·gropahani gimin inquiry-ko dakchina BJP-ni state president Ernest Mawrie dabiangaha.
Mawrie-ni parakatani gitade, Meghalaya a·doko NPP-chi dilenggipa Meghalaya Democratic Alliance (MDA) sorkario BJP-ba bak ong·paengoba, a·doko songdongenggipa manderangni namgnina iandakgipa kamrangni gimin BJP dol ma·sina nangnike, ia a·selni bidingo inquiry-ko dakchina dabienga.
Ia gital Assembly building-na gong kror 145 tangkarangko chame rikengahachim aro ia gital Assembly building-ko 2023 bilsini Assembly election-na skangan matchotna ka·dongtokengahachim.
PWD (Building)-ni Executive Engineer Ransom Sutnga-ni kobor ra·timgiparangna parakatani gitade, ia building-ni chuaniko hisape ia dome-ni jreanian batahani a·selsa ia gital Assembly building-ni nokking-o taridaldalgipa ‘dome’ be·gropna gita nangaha.
Ia be·grugimin jabolrangko rongtalatna gita komibeoba antignimangkode nanggen aro da·o ia gital Assembly building-ko matchotna gita komibeoba jachet ba jasku somoirangkode nangdapgnok ineba Sutnga parakataha.
