Shillong, May 22: Shillong songjinmani Mawdiangdiang-o rikenggipa gital Meghalaya Assembly building-ni nokkingo tarigipa ‘dome’ Robibar pringwalo be·gropaha indiba ia a·sel ong·anio janggi gimaani aro saknaa man·ani maming koborrangko man·sojaha.
Ia gital Assembly building-na gong kror 145 tangkarangko chame rikengahachim aro ia gital Assembly building-ko 2023 bilsini Assembly election-na skangan matchotna ka·dongtokengahachim.
PWD (Building)-ni Executive Engineer Ransom Sutnga-ni kobor ra·timgiparangna parakatani gitade, ia building-ni chuaniko hisape ia dome-ni jreanian batahani a·selsa ia gital Assembly building-ni nokking-o taridaldalgipa ‘dome’ be·gropna gita nangaha.
Ia be·grugimin jabolrangko rongtalatna gita komibeoba antignimangkode nanggen aro da·o ia gital Assembly building-ko matchotna gita komibeoba jachet ba jasku somoirangkode nangdapgnok ineba Sutnga parakataha.
Ia building-ni ‘dome’ be·gropanio baditana kingking noksan ong·atako man·aha ine sing·on, ia noksan ong·gipa korosrangkode Tender Agreement-ni security deposit-o pangchakesa hisapgen aro ia gital building ba nokko rikanio maiba chu·onggijanirang donggenchimode contractor-ni bill-oniko ra·skagen ine PWD official parakataha.
Sutnga-ni parakatani gitade, ia dome-ni chuaniara a·aoni metre 65-mang ong·engon, minar-ni chuaniara metre 13-mangsan ong·skaaiachim aro ia dome-ni jreaniara ton 70-mang ong·achim.
