Shillong, Jan 19: Meghalaya a•dokni SSA skulrango skigiparangna jagittamni dormaharangko on•kujaengani gimin Meghalaya SSA Schools Association (MSSASA)-ni ning•o donggipa skigiparang, January-ni 21 tariko Meghalaya a•dokni bilsi 50 gapaniko manianio nisan gisimko ra•e aro mombatirangko so•e sorkarini kosako jegalanirangko dakangskagen ine u•iataha.
MSSASA-ni president Aristotle Rymbai-ni u•iatani gitade, ia sal somoirango COVID-19 giprorotaiengahani gimin association-ni sak 10 membor-rangsan, jingjengatanio bakko ra•angaigen.
Nisan gisim ra•e jingjengataniko salni 12:00 bajioni attam 1:00 bajiona Khyndailad-o ong•atanggen aro mombati so•e jingjengataniko attam 5:30 bajio ia apsan biapon ong•atangskagen ineba ua parakataha.
Rymbai-ni parakatani gitade, re•anggipa 2021 bilsini December 9 tariko gong kror 59.34 tangkarangko aro December 22 tarikoba gong kror 73.51 tangkarangko ma•mong sorkari, SSA scheme-ni ning•o Meghalaya a•dokna chamatahachim indiba gong kror 52 tangkarangkosan ma•mongoni chamataha ine a•dokni Education Minister Lahkmen Rymbui aganskaahachim.
Indake ong•engon, skigiparangni man•na nangkuenggipa chu•gimik dormaharangko on•kujaskal skigiparang, dingtang dingtang kamrang, jekai COVID duty aro uandakgipa gipin kamrango bakko ra•jawa ine MSSASA-ni president parakataha.
