Tura, Jan 19: Changbongagipa Meghalaya Games 2024-ko Tura-o sokachakanio bak ra·na maming chanchisoani donggijagipa A·chik pante sakgittam, Weightlifting ba jreaniko chilsusaanio, gold medal ge·sa aro bronze medal ge·gniko chee West Garo Hills a·janasan ong·aigija A·chik jat gimiknan mikkim rasongko ra·baaha.

Ia A·chik pante sakgittamoni saksa John Tengsubat D Sangma-de da·o Meghalaya Games-o volunteer ong·e kamrango dangdike on·enggipa aro sakgni Raksil N Sangma aro Chukam N Marak-de Tura Fitness Centre-o an·tangtangko an·seng baljoke rakkina ranta ka·jringgipa manderangsan ong·aiachim.

Uamang sakgittaman weightlifting-ni 67 kg category susae gold medal ge·sa aro bronze medal ge·gniko cheaha.

Raksil aro Chukam-ko ia kal·susaaniona dilanggipa aro fitness centre-ni coach Torang R Marak-ni kobor ra·timgiparangna aganani gitade, weightlifting-o susana gita train ka·sona uamango maming bosturang aro cholrang dongjani gimin Bristibar salo ong·atanggipa weightlifting-o uamang bak ra·na miksonganirangba dongjachim indiba weightlifting-o bakko ra·enggiparang Garo Hills-oni saksaba dongjaenga ine uamangna u·iataniko man·soahani giminsa uamang dake nina miksonge ia susaanio bak ra·aiahachim.

“Uamang chegen inede bakko ra·a ong·jachim indiba weightlifting-o Garo Hills-oni saksaba bak ra·giparang dongjahani giminsa uamang cheoba chejaoba bak ra·e nina ine bak ra·tokaiaha. Da·alo uamang ia susaanio bak ra·e chegiparang ong·aha aro iana anga an·tangde namen kusi ong·beaha,” ine Marak parakataha.

Weightlifting-o gold medal-ko Raksil N Sangma cheaha aro bronze medal-ko Chukam N Marak baksana John Tengsubat D Sangma cheskaaha.

Iakoba poraie nina man·gen: Uttar Pradesh-ni gimaenggipa bilsi 14-ni me•chik bi•sako Assam police jokata

Watch

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub