Shillong, Jan 31: Meghalaya Lokayukta-ni gital Chairperson-na songako man•gipa gitcham IAS officer Bhalang Dhar Sombar salo, Raj Bhavan-o ku•mikchetaha aro uni ku•mikchetaniko Meghalaya a•dokni Governor Satya Pal Malik dilangaha.
Lokayukta-ni gital Chairperson-na songako man•gipa Bhalang Dhar, East Khasi Hills a•jani gitcham Deputy Commissioner-ba ong•achim aro re•anggipa bilsini May 31 tariko Lokayukta-ni gitcham Chairperson PK Mushahary-na dongimin term bon•aoni jachetni ja•manosa uko Lokayukta-ni gital Chairperson songaha.
Dhar-ko Lokayukta-ni Chairperson songna gita a•dokni Governor Satya Pal Malik, re•anggipa January 17 tariko bilko on•angaha aro uko Chairperson songani bidingo Home (Political) department, re•anggipa January 27 tariko u•iataniko on•angskaaha.
