Shillong, Mar 15: 2021-2022 bilsini gisepo Meghalaya a•doko donggipa dingtang dingtang health centre-rang aro hospital-rangko taridapna gita Health department, gong kror 72.78 tangkarangko koros ka•aha ine Mongolbar salo, a•dokni Health & Family Welfare Minister James K Sangma, Assembly-o parakataha.
Assembly-ni budget session-o Mawryngkneng MLA Pyniaid Sing Syiem-ni sing•anina aganchakaniko on•angengon, 2022-23 bilsini gisepo da•o dongsogipa PHC, CHC, hospital aro health sub-centre-rangko namdapatna aro gital rikna gita Health department, gong kror 158.56-ko chamskaaha ine Health Minister parakataha.
Sangma-ni aganani gitade, sub-centre-rangko, PHC-rangko aro CHC-rangko gital rikna aro taridapna gita sorkari, ming 336 proposal-rangko man•soaha aro ia ming 336 proposal-oni bang•batakon chu•sokatna gita sorkari jotton ka•enga.
Health engineering wing-ko mangrakbatatani gimin janapatskaengon, iana a•dok sorkari, sak 11 engineer-rangko songe on•manaha ine Health Minister parakataha.
Sak 202 staff nurse-rangko kamo rakkidapna sienga ineba Sangma, Assembly-o parakataha.
