Shillong, July 28: Budbar salo, Meghalaya a•dokni Chief Minister Conrad K Sangma, South West Khasi Hills a•jani Mawkyrwat-ona re•angenba, dingtang dingtang program-rango bakko ra•angaha.
Mawsde songo ua, Jal Jeevan Mission (JJM)-chi ge 25 nokdangrangna sale on•gipa chi pipe-rangko kulie on•angenba, songni manderang baksa agangrikangaha aro ia tom•anio a•dokni PHE Minister Renikton Lyngdoh-ba dongpae bak ra•angaha.
Mawkyrwat DC office-oba ua, Meghalaya Basin Management Agency (MBMA)-ni a•bachengatgipa PRIME Meghalaya-ni ning•o dingtang dingtang Producers Group (PG)-rang baksa tom•e agangrikangaha.
Ia tom•anio Producers Group-rang, gama ge•anirangko tang•doatani aro game ge•e man•gipa bosturangko bazar antirangona sokatani bidingo Chief Minister-na agan-talate on•angtokaha aro uaba game ge•e cha•enggiparangna tangka paisarangchi dakchakanirangko on•na sorkarini a•bachengatgipa kamrangni gimin agan-talate on•angskaaha.
Game ge•e man•gipa bosturangko nambate palna sim•na man•na gita apsan nangrime kamrangko ka•china gitaba ua game ge•e cha•giparangko didiangaha.
Gama ge•ani, jilla kaani aro uandakgipa kamrangchi game ge•e cha•enggipa manderangni man•gniko tang•doatna gita ra•gatgipa Chief Minister’s Producer Group Support Program (CM-PGS)-ni giminba ia tom•anio ua jinmana talate on•angaha.
Ia tom•anio ua dol 15 Producers Group-rangna, uamangni kamrangko tang•doatna gita dingtangmancha cheque-rangkoba suale on•angjolaha.
Mahatma Gandhi National Rural Employment Guarantee Scheme (MGNREGS)-ni ning•o Jashiar songo Rilang chiringko kabatgipa dolongkoba ia apsan salon, a•dokni Chief Minister, PHE Minister baksa oprake on•angjolaha. Ia metre 53 ong•e bakrogipa dolongko Nongbah, Marshillong aro Jashiar songni village employment council (VEC)-rang nangrime rikaha aro ia dolongko jagittamni gisepon matchotatna man•aha.
Ia dolongko oprake on•angani somoio a•dokni Chief Minister, jinmana aganprakengon, MGNREGS-ni kamrangko ka•anio Meghalaya a•dokba nambatsranggipa a•dokrangoni damsa ine mingako man•aha aro ia scheme-ni ning•o gong kror 1600-na baten tangka paisarangko man•soe Assam gita dal•dalgipa a•dokrangna bate man•aha ine parakangaha.
Ja•mano ua songni PMAY nokrangkoba niangaha aro Sakwang songo COVID man•e sianggipa mande saksani nokdangna gong 50,000 tangkako pakwate on•angaha. Ia nokdango sianggipa me•chik, an•tangni dedrang sakskuko wate siangaha aro chonbatgipade sal 15-san ong•engpitichim.
Ia songo ua COVID-19-ko warachakani giminba songni nokni dilgiparang aro songna kam ka•giparang baksa agangrikangaha aro tikarangko su•e ra•china gita songni manderangko didiangaha.
Ja•mano ua Mawkyrwat CHC-onaba re•ange kamrangko niangjolaha.
