Shillong, Apr 20: Budbar salo, Meghalaya a·dokni Power Minister aro Deputy Chief Minister Prestone Tynsong-ni dilanichi dingtangmancha tom·aniko ong·atangenba, a·doko ra·gatgipa dingtang dingtang power project-rangko nipilangaha.
Ia tom·aniona sorkari, dingtang dingtang project-rangko jako ra·e ka·na gita 2007 bilsioni sorkari baksa MoU-o soi ka·grikgipa dingtang dingtang dolrangkoba okamataha.
Ia tom·anio dingtang dingtang developer ba namdapatani kamko ka·enggipa dolrang sorkari baksa agangrikengon, mitam project-rangkode chu·sokatna neng·ani ong·gen ine nikenba mitam project-rangkode dontongatna tik ka·angaha aro uandakgipa project-rangoni mitamranga Kynshi Stage-I project aro Kynshi Stage-II project ong·a. Ia project-rangko developer-rang jako ra·na nangnikgijaniko parakahani gimin uamang baksa soi ka·grikgipa MoU-ko sorkari den·galpilaha ine a·dokni Power Minister parakataha.
Wah Umiam Stage-III-na 2012 bilsio NEEPCO Shillong baksa MoU-o soi ka·grikgipa project-ni gimin janapatskaengon, ia project-na da·o a·arangko ra·engaha aro a·a ra·ani kamrangko matchotahaode kamrangko a·bachengatgnok ine Tynsong parakataha.
Umiam stage I aro II-ni gimin janapatskaengon, songgigrikani kamrangko sorkari matchotangengaha aro bakan MoU-o soi ka·grikna gita Cabinet-ona ra·anggok ine Power Minister parakataha.
Tynsong-ni parakatani gitade, East Garo Hills a·jao thermal power project-ko ra·gatna gitaba NEEPCO, 2011 bilsion MoU-o soi ka·aha aro iana da·o lekkani kamrangko a·bachengataha. Lekka-ni kamrangko matchotahaon, East Garo Hills a·jao thermal project-ko a·bachengatgnok ine Tynsong parakataha.
