Shillong, Mar 23: Budbar salo, Meghalaya a•dokni BJP dol, dingtangmancha tom•aniko ong•atangenba, ma•mong sorkarini ra•gate on•gipa dingtang dingtang scheme-rangko nirokna gita Central Scheme Monitoring Committee (CSMC)-ko songe donangaha aro ia committee-ko dilna gita BJP MLA AL Hek-ko committee-ni chairman dake songe donangaha.

CSMC-ko dilna gita songako man•ani ja•man AL Hek an•tangan, damgittam a•jarangna chairman sakgittamko songe on•angskaaha aro uamangara Garo Hills-na Tura-ni MDC Bernard Marak, Khasi Hills-na Bernadette Lyngdoh aro MDC Lakhan Biam ong•a.

Ia sakgittam dilgiparang da•o an•tangtangni committee-rangko songenba, ma•mong sorkarini ra•gate on•gipa scheme-rangko name chu•sokatna gita a•dok sorkarini jako ra•e ka•enggipa biaprango program-rangko ong•atangskagnok.

Ma•mong sorkarini ra•gate on•gipa scheme-rangko manderangona sokatna aro ia scheme-rangko nambate chu•sokatna ia committee kamko ka•anggen ine Hek parakataha.