Shillong, March 18: Meghalaya a•doko COVID-19-ni giprorotaianiko champengsona gita a•dok sorkari nanga gita ja•kurangko de•samsoenga ine Bristibar salo a•dokni Chief Minister Conrad K Sangma parakataha.
Chief Minister-ni parakatani gitade, Meghalaya a•doko COVID-19-ni giprorotaianiko champengsona gita sorkari, Maharashtra, West Bengal, Karnataka, Kerala, Gujarat aro uandakgipa a•dokrangoni re•baenggipa manderangko a•dokni entry point-rango RT-PCR test-ko ra•atna manchisoaha.
Gipin biaprangoni re•baenggipa manderangko sorkari, quarantine dakchina ba dingtang nape dongchina ge•etenga ong•ja indiba COVID-19 donggijani certificate donggijagipa manderangkosa RT-PCR test ka•china aganenga ineba Chief Minister talatangaha.
Budbar salo Prime Minister baksa COVID-19-ni bidingo chanchirimgipani gimin janapatengon, batanggimin chango gita ong•jachina a•songni Prime Minister, mikrake kam ka•china dingtang dingtang a•dokrangko didiataha ine Chief Minister parakataha.
“Sabisirang giprorotaiani somoirangona chinga tarisoaha aro pilak a•dokrangan da•o an•tangtangko nambate tarisamsotokaha. Bang•bata a•songrangon da•o sabisirang giprorotaienga aro India a•songoba an•ching ia sabisini giprorotaianiko nikna man•engaha,” ine Chief Minister parakatenba, ia sabisiko nengrae ra•jachina aro mikrake dongchina a•doko songdongenggipa manderangko didiataha.
