Shillong, June 18: Meghalaya a·doko coronavirus-ni giproroaniko champengna gita Sukrobar salo sorkari, apsan niamrangkon ra·gatangkuaha.

Re·anggipa antio sorkarini donatgimin niamrang gitan, Meghalaya a·dokni dingtang dingtang a·jarango obostarangko nigrike aro 20 percent-na batgija dokkanrangko kulina on·china gita sorkari, dingtang dingtang a·jani deputy commissioner-rangna bilko on·angtaiaha.

Gipin a·jarango obostarangko nigrike niamrangko ra·gatchina DC-rangna bilko on·ahaoba East Khasi Hills a·jaode chu·gimik lockdown-ko ra·gatangkugen ine u·iataha.

Iani bidingo kobor ra·timgiparangna u·iataniko on·angengon, Meghalaya a·doko aro mongsongbate songadam nokadamrangoba COVID-19-ko man·giparang batrorobaengani gimin skango ra·gatgimin apsan niamrangkon ja·rikangkugen ine Sukrobar salo, a·dokni Health Minister AL Hek parakataha.

Sukrobar salo a·dokni Chief Secretary MS Rao-ni gital u·iataniko on·atani gitade, re·anggipa antio sorkarini on·gimin apsan niamrangkon da·o gital ge·etanirangko on·taikujaskal, re·baenggipa June 21 tarikona ja·rikangkugen.